جمعه, 07 ارديبهشت 1397 | Login
رسول اسماعیلیان

رسول اسماعیلیان

هايكو

ژاپنون اون‌‌يئددي «مورا»لي شعري -هايكو- بوگون دونيانين چوخ اؤلكه‌لرينده ادبياتچيلار آراسيندا تانيش بير كلمه ساييلير. بعضاً هايكونو 17 هجالي شعر آدلانديريرلار آنجاق ديلچي‌ليك باخيمين‌دان، «هجا» ايله «مورا» ايكي مختلف آنلاييش‌لارديرلار. هر بير قيسا هجا بير مورا ايله برابردير.) اؤرنك اوچون o) آنجاق هر بير اوزون هجا ، ايكي «مورا» ايله برابردير(اؤرنك اوچون yaz هجاسي، ya ايله z مورالاري ايله برابردير). بئله‌ليكله ژاپن شعرلرينين وزني مورالار ساييسينين اساسيندا تعيين ائديلير.

هايكو، ژاپن شعرينده، «تانكا»يلا «رنگا» شعرلريندن آلچاق درجه‌ده اولسادا، آنجاق ژاپن سرحدلريندن چيخاندا بو شعر ژاپنون اّن آدليم شعري ساييلير. هايكو فرانسه ديلينه چئوريله‌ندن سونرا، ايماژيست شاعرلرين ديقتلرينده اولوب. هايكو‌دان تاثير آلان شاعرلردن، ازرا پاوند (1972-1885) ، پاول الوار (1952-1895)، تي.اس.اليوت (1965-1888)، اكتاويو پاز (1998-1914)، رابيندرانات تاگور (1941-1861)، امي لاول (1925-1874)، رابرت فراست (1963-1874)، دبيليو.بي.يتيس (1939-1865)، جيمز كركاپ(2009-1918)‌دان آد آپارماق اولار.

«هايكو» سؤزو ايكي هيجادان تشكيل تاپيب‌دير: «هاي» سؤزو آرتيست، «كو» سؤزو ايسه مصرع آنلاميني داشييير. بو شعر بيرينجي دؤنه 16-جي يوزايلليكده «هوكو» آدييلا ژاپن شعرينده باشلانيب آنجاق 19-جو يوزايلليكده، ماسائوكا شيكي‌نين ادبي انقلابي اوزره «هايكو» آديلا تانيندي. بو آد اصلينده «رنگا» يا « هايكاي» شعرلرينين باشلانيشيندان آلينيب. «رنگا» يا «هايكاي» شعرلري 31 مورادان(7-7-5-7-5) تشكيل تاپيبلار. هر ايكي شعرده «فصيل سؤزجويو» ايشله‌نير. بو ايكي شعر يالنيز محتوا باخيميندان فرقله‌نيرلر. اؤزلليكله «رنگا» شعرينده استعاره ايله تشبيه‌ چوخلو ايشله‌نيلير حال بو كي « هايكاي» شعرينده استعاره ايله تشبيه‌ مطلق ايشله‌نيلمير. دئمه‌لييك «رنگا» يا «هايكاي» شعرلري ايكي بؤلومدن تشكيل تاپيرلار، بيرينجي بؤلوم «هوكو»، ايكينجي بؤلوم ايسه «آگه‌كو» آدلانير. هوكو بؤلومو نئچه دئييشيكليكدن سونرا هايكويا چئوريليب دير.

هايكو، اوچ مصرع‌دن تشكيل تاپيب. بيرينجي مصرع بئش، ايكينجي مصرع يئددي اوچونجو مصرع ايسه بئش مورادا اولور. مصرع‌لرين بئله بير دوروم‌دا دوزولوشو، ژاپنون ائشيتيم لذتي و ژاپن‌لي اوخوجوسوندا تاثيرلي اولماغيندان آسيلي‌دير، نئجه كي بئله بير دورومو(بئش يا يئددي مورالي مصرع‌لر) ژاپنون باشقا شعرلرينده ده گؤرونور، نئجه كي آذربايجان كلاسيك هجا شعرينده 11 هجالي ، 8 هجالي يا 7 هجالي مصرع‌لر آذربايجانلي اوخوجويا تاثيرلي‌ ديرلر.

آنجاق ترجمه‌لره باخماياراق، ژاپندا هايكونون اوچ مصرعي‌ده بير سطيرده يازيلير و مصرع‌لرين اورتاسي يا سونوندا بير حرف گتيرمكله مصرع‌لر بير‌بيريندن آيريليرلار. بو حرف «كيره‌جي» آدلانير كي چوخ حالدا آدلارين سونونا آرتيريلير. كيره‌جي چوخ حاللاردا «و» معناسيني داشييير.

Fu/ru/i/ke/ya/ Ka/va/zu/to/bi/ko/mu/ Mi/zu/no/o/to

اسكي گؤل‌ده
قورباغانين آتيلماسي
سويون سسي

بو هايكودا «ya» حرفي «و» معناسيني داشييان بير كيره‌جي دير.

محتوا باخيميندان هايكودا چوخ طبيعت‌دن قيسا آنلار وصف اولونور آنجاق بو وصف‌لر انسانلارلا طبيعتين ايلگي‌لريندن سؤز آچيب، ايچ قاتلاريندا درين و دويغولو معنالار داشيييرلار.

طبيعت‌له باغلي بئله بير باخيش، زامان و بونونلا برابر هايكونون سؤيله‌ديگي فصيلي گؤسته‌رن بير كلمه‌يه يئر آچير. بو كلمه‌يه «موسوم سؤزجويو» دئييلير. ژاپن فرهنگينده بو كلمه فصيللره، يا ايلين باشلانيش گونلرينين بيرينه اشاره ائدير. ژاپونون اسكي تقويملرينده هر فصيل آلتي يئره بؤلونوب، هر بؤلومه اوچ چئشيدده فصيل سؤزجويو عايد اولوب كي بوتونلوكده هر ايل اوچون يئتميش ايكي اؤزل فصيل سؤزجويو عايد‌دير. اؤرنك اوچون باراما قوردو - ياز سؤزجويو، هلو - ياي سؤزجويو، آي - پاييز سؤزجويو، قار ايسه - قيش سؤزجويو ساييلير. فصيل سؤزجويو تكجه فصيللري گؤسترن بير كلمه دئييل بلكه هايكونو ساده‌جه بير تصوير‌ اولماقدان قوپاريب، زاماندا آخيجي ائدرك كئچميشلرله ايلگيله‌نديرير. هايكو ، فلسفه باخيميندان «ذن»‌ه باغلي‌دير.

بوتونلوكده دئمك اولار هايكونون درين جاذبه‌سيني هاراداسا يالنيز ژاپن ديلينده و ژاپن كولتورونده دوشونمك اولار. دئمك اولار بو قايدا دونيانين هر بير ديلينده يارانان شعرلرينده وار آنجاق ژاپوندا هايكونون اوخوجولارلا ايلگيسي آرتيق درين‌دير ائله كي ژاپنون بير طب مركزينده، روح خسته‌ليك‌لريني هايكو ايله درمان ائديرلر. بو شعر باشقا ديللره چئوريلنده بير چوخ قابليتلريني ايتيرير. بو قابليتلرين چوخو ژاپن كولتوروندن آسيلي‌دير. اؤرنك اوچون هر ايل ژاپندا «داود» چيچكلرينه عايد ياريش كئچيريله‌رك اَن گؤزل چيچه‌يه مكافات وئريلير. عين حالدا ژاپندا «مي نااُسو» آدلي بير آنلام وار. مي نااُسو، انسانين بير شئي اوزره عقيده‌سي دئييشيلندن سونرا ائله او شئي‌ه يئني دن نظر سالماسي دئمكدير. بئله بير دورومو نظره آلاراق «كوباياشي ايسا»نين بو هايكوسون اوخوياق:

او گئجه
يئني دن داود چيچه‌يينه گؤز تيكديم
او اودوزموشدو

دئمك اولار هايكونون قيسا بيچيملي بير شعر اولماغي، اونون به‌يه‌نيلمه سببلريندن بيري دير آنجاق بو قيسا اولماغا باخماياراق اوندا درين معنالار وار. اؤزلليكله ايجاز، هايكونون اساسلاريندان بيري‌دير. بونو آرتيرمالييق ژاپن شعرينده هايكوداندا قيسا شعر بيچيمي واردير. ماتسو باشو نون كيورايي آدلي اؤيرنجيسي، «واكي» آدلي اون‌دؤرد مورالي بير شعر بيچيميني رواج وئردي آنجاق هايكو ساياغي قارشيلانمادي.

هايكو ايلك باخيشدا، قيسا بير شعر اولماغينا گؤره و عين حالدا اوندا عموميتله "آنليق بير وضعيت" آلينماسي اوزره، عادي بير مشاهيده‌نين محصولو اولدوغو دوشونولور و اونون راحاتجا يازيلماسي تصور اولونور آنجاق دئمك اولار هايكو تكجه بير شعر فورماسي دئييل، بير گؤرمه فورماسي‌دير. هايكو قارشي‌داكي عمومي تعريف‌لردن فايدالانا‌راق باشقا بير ساده ايضاحاتلا، يئني‌دن شرح ائده بيلمه گوجونه صاحب اولما‌لي‌دير. او، حادثه‌لر ايچينده بير آني گؤتوروب، اونون ايچ طبيعتينه داها بير اؤزل باخيشلا نفوذ ائده‌رك او آني قاليجي بير آن اولا‌راق پايلاشير.

"گؤستر، آنجاق چكين سؤيله‌مه!" - قايدا بودور.

رولان بارت دئميشكن: «هايكودا بير شبح خصوصيتي وار، اودا هر بير كسين اونون آسانجا يازيلماسي حاقدا دوشونمه‌سي‌دير، آنجاق ائله او شخص بير هايكو يازماق ايسته‌ينده باشقا جور دوشونور.» دئمك اولار هايكونون دونيادا ياييلماسي‌نين سبب‌لرينين بيري‌ده ائله بو ساده‌ليك‌دير. بو ساده‌ليك اوخوجولارين بو شعره ماراق گؤسترمه‌سي و بو شعريله ايلگي قورماقلارينين اساس سببلريندن بيري‌دير. ايكينجي دونيا ساواشيندا عسگرلردن قالان خصوصي دفترچه‌لرينده هايكو ساياغي چوخلو شعرلر گؤرونور عين حالدا اينتحار ائدن انسانلارين كئچميشلري اوزره بير تحقيق ده گؤرونور، اونلارين چوخو سربست شعريله ايلگيلي اولوبلار حالبوكي هايكو ايله ايلگيلي اولوب، اينتحار ائدن انسانلارين سايي چوخ-چوخ آزدير. بونلار هاميسي بو شعرين اوخوجويلا درين ايلگيلي اولماغيندان و اوخوجودا درين تاثير قويماغيندان خبر وئرير.

ياخشي بير هايكونون گوجو، فردي بير حسي ياراديب و او حسي داشيماق‌دادير. عموميتله قبول اولونان بير اساسا گؤره، بير گوجلو هايكودا سؤز آرتيرماق، چيخارماق يا هر هانسي بير كلمه‌نين يئريني دئييشديرمك اولماز.

ژاپنونون آدليم هايكو يازارلاريندان ماتسوٱ باشو (1694-1644)، يوسا بوسون (1783-1716)، كوباياشي ايسا (1827-1764) و ماساوكا شيكي (1902-1867) دن آد آپارماق اولار. كوباياشي ايسا‌نين هايكولاريندا اومانيستي باخيشلار، ماسائوكا شيكينين هايكولاريندا رئاليستي باخيشلار، بوسونون هايكولاريندا هنري باخيشلار، ماتسوٱ باشونون هايكولاريندا ايسه روحاني باخيشلار واردير. ماتسوٱ باشو اؤز اؤيرنجي‌لريله هايكاي شعريني يئني بير دوروما ساليب و اونا جدي بير ادبيات سايقينليغي قازاندير‌دي. ماساوكا شيكي ايسه معاصر هايكونون قوروجوسو ساييلير. عيني زاماندا هايكو آنلاييشينين (هايكاي يا هوكو قارشي‌سيندا) يئرلشمه‌سيني الده ائدن ده او اولموش‌دور. دئمك اولار شيكي‌دن سونرا هايكو شعري ايكي استقامته بؤلوندو. شيكي‌نين ان اهميت‌لي ايكي شاگردي‌نين- تاكاهاما كيوشي (1874-1959) و كاواهيگاشي هئكيگوتو (1873-1937)- ژاپن هايكوسونا تأثيرلري بو گونه قدر سورن و تعيين ائديجي بير حركت ساييلير. هئكيگوتو، شيكي‌نين اصلاحات‌لاريني داوام ائتديردي و يئني فورما‌لار سينا‌دي. كيوشي بو تجروبه‌لره قارشي بير حركت اولا‌راق «عنعنوي هايكونو» كشف ائتدي. كيوشي‌نين آپ-آيدين تأثيري بو گون ژاپندا «عنعنوي هايكونون» مشهورلوغوندا اؤزونو گؤسترير. كيوشي مكتبين‌دن چوخ معتبر شاعرلر چيخدي. او سيرادان ميزوهارا شواُُشي (1892-1981)دن آد آپارماق اولار. عين حالدا هئكيگوتو حركتين‌دن ايسه هايكونون سربست شك‌لي اينكيشاف ائديلدي. ايپپئكيرو ناكاتسوكا (1887-1946)، اُگيوارا سئيسئنسوئي (1884-1976)، اوزاكي هوساي (1885-1926) و خصوصيله ژاپونون ان چوخ اوخونان هايكو يازي‌چي‌لارين‌دان اولان تانئدا سانتوكا (1882-1940) كيمي اهميت‌لي شاعرلر بو سيرادان ساييليرلار.

بونودا دئمه‌لييك ايكينجي دونيا ساواشيندان سونرا ژاپنون حد‌دن آرتيق ميلليت‌چي‌ليك تجربه‌لري سببيله، ليبرال بير هايكو حركتي اورتايا چيخدي. تاكاهاما كيوشي يه اويغون گله‌رك «عنعنوي هايكو» قايدا‌لارينا رعايت ائتمه‌ين «شينكو هايكو اوندو»(يئني چيخان هايكو حركتي) شاعرلري حبس اولونوب و شكنجه گؤروب، ژورنال‌لاري ايسه قاداغان ائديلميش‌دير. آرتيرمالييق، ساواشدان سونرا تاكاهاما كيوشي ژاپنون اطلاعات قووه‌سينين‌ آلتيندا، چاليشان مدني فعاليت‌لره نظارت ائتمك اوچون دؤلتين تبليغات تشكيلاتي اولان «ژاپن ادبياتي وطن‌پرور جمعيتي»نين هايكو بؤلومونون باشچي‌سي اولدو.

دوغروسو دئمه‌لييك هايكونون قايدالاري بوتون شاعرلر طرفيندن رعايت اولونمور. بعضي شاعرلر 5-7-5 قاليبيني، بعضي‌لر ايسه يالنيز فصيل سؤزجويونو هايكودا رعايت ائديرلر، بعضي‌لري ده هر ايكي‌ قايداني رد ائديرلر. كوباياشي ايسا دا بعضا 5-7-5 فورمونو پوزوبدور. ژاپن يازارلار آراسيندا هايكونون اون يئددي مورالي اولدوغو و موسوم سؤزجويونون هايكودا گركلي اولماغيني پوزان شاعرلردن اوزاكي هوسايي(1926-1885) ايله سانتوكا(1940-1882)دان آد آپارماق اولار.

بو هايكو ژاپن ديلينده 9 مورالي‌دير. فصل سؤزجويو ايله كيره‌جي‌سي‌ده يوخدو.

اؤسگوره‌نده‌ ده
يالقيزام (اوزاكي هوسايي)

اصلينده هايكو كيشي‌سل بير شعر تانينيردي آنجاق سون يوزايلليكده بير نئچه قادين شاعري هايكو يازماغا ماراق گؤسترمه‌سينده بو شعر ژانريني كيشي‌سلليكدن قورتاردي. تي جي ناكامورا بو قادين شاعرلردن بيري‌دير.

هايكو باشقا ديللرده يازيلاندا او ديل و او كولتوره باغلي چوخلو تاثيرلر آليب و چوخ قايدالاري پوزولوبدور، نئجه كي «بيليمسل-بديعي هايكو»ون مضمون باخيميندان هايكو ايله اساس فرق گؤرونور، ائله كي هايكودا طبيعت مضمونو «بيليمسل-بديعي هايكو»ده يئريني بديعي، علمي و يا دهشت مضمونونا وئرير. بونو آرتيرمالييق «بيليمسل-بديعي هايكو»نون مانيفستي 1995-جي ايلده تام برينك ين طرفيندن وئريلدي آنجاق بو مانيفست دن چوخ قاباق بيليمسل-بديعي هايكو نمونه‌لري بير نئچه كتابدا يازيلميشدي. اؤرنك اوچون 1962-جي ايلده كارئن كروز آندئرسون بو هايكونو چاپ ائتميشدير.

بو حلقه- حلقه خيارلاري
هله «سيرتيس» چؤلونده اَكمه‌ييبلر
نه قدر يئريكله‌ميشم

بوتونلوكده

ائدو دؤورو (1868-1600)، ماتسواُ باشو(1644–1694)، يوسا بوسون (1716–1783)، كوباياشي ايسا (1763–1827)، ميجي دؤورو(1912-1868)، ماسااُكا شيكي (1867–1902)، كاواهيگاشي هئكيگوتو (1873–1937)، تاكاهاما كيوشي (1874–1959)، تانئدا سانتوكا (1882–1940)، اوزاكي هوساي (1885–1926)، ميزوهارا شواُشي (1892–1981)، ياماگوچي سئيسون (1892–1988)، سايتو سانكي (1900–1962)، هينو سوژو (1901-1956)، ياماگوچي سئيشي (1901–1994)، ناكامورا كوساتااُ (1901–1983)، اُنو رينكا (1904–1982)، كاتو شوسون (1905–1993)، فوروساوا تايهو (1913–2000)، سوزوكي ماساژو (1906–2003)، موري سوميو (1919–2010)

ژاپنون هايكو ادبي دؤورلرينين ان اؤنملي شاعرلري ساييليرلار.

نئچه هايكو :

1) دانيشماديلار
نه ائو ييه‌سي، نه قوناق
نه ايسه داود چيچك‌لري (ريوتا)

2) آي باتي‌يا اوزاناركن
دوغويا سوروشور
كؤلگه‌سي چيچك‌لرين (بوسون)

3) كوچه لامپاسي
هر گئجه يالقيز قالار
يالقيز و ايشيق‌لي! (تويكو)

4) قولچاقلارلا
نه اينجه داورانير
سونسوز قادين (ران ستسو)

5) يئني‌دن "دنگ، دنگ"
داغلارين معبدينين ناقوسو
يازين ياغيشي (كوباياشي ايسا)

6) كيم اولدوغومو بيلميرم
بير پاييز آخشامينين آل گونشي
آديمي اؤزويله آپاريب (ريچارد رايت)

7) باهار كؤچدو
قوشلار آغلادي
بونلار باليغين گؤزونده كي ياشلار


قايناقلار:

1) Haiku Nedir - Haiku Örnekleri - Haiku Şiirleri Smiljka Gagic
2) Michael Dylan Welch’in Haiku Üzerindeki Düşünceleri Çeviri: Burcu Erdoğan 2004
3) Vikipedi, özgür ansiklopedi
4) هايكو از آغاز تا امروز/برگردان احمد شاملو- ع پاشايي/نشر چشمه/۱۳۸۴
5) صد هايكوي مشهور/دانيل سي بيوكانن/برگردان ع.پاشايي/۱۳۶۹
6) هايكو، شعر ژاپني / ترجمه ع.پاشايي و نسترن پاشايي/ نشر نظر/ 1390
7) هايكوهاي پاييزي ژاپن، با موضوع "گل داوودي" / مسيح طالبيان
8) هايكو/ قدرت الله ذاكري

About Author

انجمن ادبي بولاق با دو كارگاه شعر و داستان نويسي به ترتيب در روزهاي دوشنبه و چهارشنبه از ساعت 16 الي 18 در كتابخانه اداره ارشاد اسلامي شهرستان مشگين شهر، طبقه همكف تالار انديشه در اتاق انجمن برگزار مي شود و شركت براي عموم آزاد است.

نظر دادن

از پر شدن تمامی موارد الزامی ستاره‌دار (*) اطمینان حاصل کنید. کد HTML مجاز نیست.

طراحی و توسعه توسط رافق مجتهدزاده خیاوی