جمعه, 07 ارديبهشت 1397 | Login
شريف مردي

شريف مردي مطلب ویژه

«شريف مردي» دن «سئحيربازلار دره‌سي» رُماني حاقدا سايكوآناليتيك بير تنقيد. بئله-بئله بيليمسل مقاله‌لر ادبياتيميزدا آزدير، اوخوماسيني اَلدَن وئرمه‌يين...

پسيكوآناليسيس آچيسيندان «سحيربازلار دره‌سي» رومانينا بير باخيش


گيريش:
ادبياتدا پسيكوآناليتيك[روانكاوانه] نقد ، «فرويد »ين يازينسال ياپيتلار اوچون، اؤز نظريه‌سي اوزره يازديغي آچيقلامالارلا باشلادي. فرويد انگليس، آلمان و روسيه ادبياتيني دريندن تانيميشدي. روسيه‌دن داستايئوسكيني سئور بيريسي ايدي و «كارامازوف قارداشلاري» اوچون اؤنملي بير مقاله يازدي.
فرويد يازيلميش اثري هر كسين يوخوسوندا گؤردويو رؤيالارلا بير توتوب و اونلاري يازار اوچون گيزلين ديلكلرين گئرچكله‌شمه‌سي سانميش. بئله بير باخيشدا «يازينسال متن» يازارين نئروسيس[روان-رنجوري]لييي‌نين نيشانه‌لري‌دير دئمك. بوندان دولايي ايسه فرويد يازيدان يازارا دؤنمكله يازاري ـ ياراتديغي رؤيالاري اوزره ـ پسيكوآناليسيس[روانكاوي] ائدير. فرويد «داستايئوسكي و آتا قتلي» آدلي مقاله‌سينده داستايئوسكي‌نين شخصيتيني دؤرد حيصّه‌يه آييرميش؛ هملئت اويونونو آچيقلاركن شئكسپيئرين كاراكتئرينه باخميش و لئوناردو داوينچي‌نين ده شخصيتيني ياراتديغي ياپيتلاري اوزره پسيكوپاتوگرافي [آسيبنگاري] ائتميشدير. ماري بوناپارت  ـ فرويدين شاگيردي ـ  ائدگار آلئن پو ـيا توخونموش. نه ايسه بئله بير ايله‌تيشيم ادبي نقد نظريه‌لرينده منسوخ اولموش ايندي.
بو آچيني فرويدون اؤز شاگيردي ائرنئست جونز  «هملت و اوديپ» آدلي كيتابچاسيندا دالدا قويوب و متنين اؤزونه كئچدي. او متنه اؤنم وئريب، متدن ديشاري هر زاددان واز كئچدي. بو باخيشدا «متن» پسيكوآناليسيس اولونور دئمك؛ متنده اولان كاراكتئرلرين داورانيشلاري ـ متندن شاهيد گتيرمكله ـ آچيقلانير.
اوچونجو آچي ادبي نقدده (پسيكوآناليسيس آچيسيندان) 1960‌لاردان بري نورمن هولند‌له باشلانميش. اوخوجو متنين اوخوماغيندا لذت آرايير؛ فرويددان آلينميش بو باخيشي نظرده توتماقلا، اوخوجونون متنله ايليشگيسي اؤنملي ساييلير و پسيكوآناليسيس اولان اوخوجو و اونون متنـه اولان تپكي‌سيدير. بئله‌ليكله متندن مؤلفين اؤزونه، سونرا متندن متنـه و داها سونرا متندن اوخوجويا كئچيلميشدير؛ باشقا سؤزله دئسَك: ايلك باخيشدا ياراديجي‌ايدي پسيكوآناليسيس اولان، سونرا اثرده اولان شخصيتلر و داها سونرا اوخوجو.

About Author

انجمن ادبي بولاق با دو كارگاه شعر و داستان نويسي به ترتيب در روزهاي دوشنبه و چهارشنبه از ساعت 16 الي 18 در كتابخانه اداره ارشاد اسلامي شهرستان مشگين شهر، طبقه همكف تالار انديشه در اتاق انجمن برگزار مي شود و شركت براي عموم آزاد است.

1 Response Found

نظر دادن

از پر شدن تمامی موارد الزامی ستاره‌دار (*) اطمینان حاصل کنید. کد HTML مجاز نیست.

طراحی و توسعه توسط رافق مجتهدزاده خیاوی