جمعه, 07 ارديبهشت 1397 | Login

درویش اوغلو

دوشنبه, 12 مرداد 1394 15:48

درویش اوغلو

ابوالفضل جورابچی (درویش اوغلو)

 

روح ساغالتیجیلیقدا(پسیکوتراپی ده) اینجه لیکلر

 

1- عمومی باخیش

 

روح بیلیمی (پسیکولوژی) انسان استروکتورونون (ساختار) و انسانلار آراسی ارتباطلارین بیلیمی اولدوغو اوچون، هر انسانین بو بیلیمدن آنلادیقلاری وار. روح بیلیمی باره سینده تک بیر کلمه اوخومامیش بیر انسان بئله روح بیلیمچی دیر. بو فیکری آیدینلاشدیرماق اوچون روح بیلیمینی موسیقی ایله قارشلاشدیریرساق، دئمک اولار کی، موسیقی سس و سس بولاشیمی صنعتی اولدوغو اوچون، و هر انسانین (آنادان دوغما کارلاردان سیوای) سسلری آلقیلاییب، بو سسلره بنزرلر یاراتماق گوجو اولدوغوندان، هر انسانین موسیقی صنعتیندن بللی اؤلچوده آنلادیقلاری اولدوغونو ادعا ائتمک اولار. بیریسی بیر ماهنی نی، بیر نغمه نی دیل دوداغی آراسیندا میزیلداناجاق قدر، بیریسی بیر نغمه نی فیشقیراق ایله چالاجاق قدر، بیریسی بیر نغمه نی بیرموسیقی یاراغی ایله سسلندیره بیلجک قدر، بیریسی ایکی – اوچ موسیقی یاراغینی اوستاجا چالابیلدیگی قدر و بیریسی ایسه بیر سنفونی یارادیب اللی- آلتمیش چالقیچینین بیر- بیرینه اویغون چالمالارینی دوزنله یه بیلجک قدر موسیقی صنعتیندن آنلایابیلر. بو آنلامدا، هر انسانین موسیقی صنعتیندن آنلادیغی کیمی، هر انسانین دا روح بیلیمیندن آنلادیغینین بللی اؤلچولرده اولدوغونا دققت ائتملی ییک. بیریسی بیر انسانین مهربان، الی آچیق، خوش گؤرولو، یاخود اتی آجی، قیسقانج، یوخسا دوشمانجا اولدوغونو آنلایابیلجک قدر، بیریسی اؤزونون مهربان، یوخسا اتی آجی بیر انسان قارشیسیندا نئجه ترپنه جگینی بیله جک قدر، بیریسی مهربان، یوخسا اتی آجی بیر انسانین ندن مهربان، یوخسا اتی آجی اولدوغونو آنلایابیدگیندن بو انسانا قارشی نه تهر یاخینلاشاجاغینی بیلجک قدر و بیریسی ده، بیر انسانین اتی آجیلیغینی آرادان گؤتوره بیلمه سینه یاردیمجی اولابیلجک قدر روح بیلیمچیلیکدن آنلایابیلر.

روح ساغالتیجیلیق (پسیکوتراپی) ایسه بو اؤلچولرین اوستونده دیر. روح ساغالتیجی (پسیکوتراپویت)، موسیقی صنعتچیسی ایله قارشیلاشدیردیغیمیزدا، بیر سنفونی ده چالینان سازلارین هانسی سازلار اولدوقلارینی، بوسازلارین تک تکینین، تک باشینا نه جور چالیندیغینی، هانسی کؤکلرده کؤکلنمه سی گرکدیگینی بیلمه سینین یانیندا، بیر سنفونی ده اورتایا چیخمیش اویومسوزلوغون هانسی و نئچه سازین کؤک اویومسوزلوغو اولدوغوندان، یوخسا او سازین اؤزونده، جسمینده، بیر سینیقلیق، آقساقلیق اولدوغوندان ایرلی گلدیگینی آنلاییب، او سازین سینیق - سالخاقلیغینی ساغالدیب، سنفونیه اویغون شکیلده کؤکله یه بیلمه گؤجونه صاحب اولابیله جک بیر انسان اولمالی دیر. هر پروفسیونل موسیقی صنعتچیسینین بتهوون، یوخسا چایکوفسکی نین یاراتدیغی سنفونیلر قدر گوجلو سنفونی یارادابیلمه دیگینین آیدین اولدوغو کمی، هر روح ساغالتیجینین دا روح ساغاتلیجیلیق صنعتینین بوتون ساحه لرینده تبحره صاحب اولابیلمه دیگی آیدین دیر.

 

آنجاق روح ساغالتیجی هر زامان آقساق و اویومسوز بیر سنفونی ایله قارشی قارشیا دیر. دئلمی اؤز ایچیند، یاخود انسانلار آراسی ارتباطلاریندا بیر آقساقلیق، بیر اویومسوزلوق اولان بیر انسان ایله قارشی قارشیا دیر. اونون بو آقساق و اویومسوز سنفونی نی دوزن و اویوما گتیره بیلمه گوجو، اونون تئوریده اؤیرندیکلریندن اؤته یه، پراتیک اولاراق سنفونی نی آقسادان و اویومسوزلاشدیران سازلاری تاپیب، بو سازلارین آقساقلیقلارینین سازین جسمیندن می، یوخسا کؤکوندن می اولدوغونو آیدینلاشدیریب و اونا گؤره آقساقلیغی ساغالتما گوجونه باغلی دیر.

انسان استروکتورونو بیر سنفونی ارکسترینه بنزرلیکده اله آلیرساق، بیر سنفونی ارکتسرینین ایکی بویوتوندان، بیرینجیسینین گوبوت ماددی بویوتو، دئملی سازلار، بئش تار، اوچ کمانچا، بیر کلاویه، دؤرد ویولون، ایکی ویولون سل و .....ایکینجی بویوتونون ایسه بو ماددی بویوتون ایشله ییشیندن عمله گلن اینجه ماددی بویوتو، دئملی سازلارین چالیشیندان عمله گلن سسلر، اولدوغونو آنلاماق چوخ چتین دگیل. انسان روحونون استروکتورونو آچیقلاماق و آنلاتماق اوچون انسان استروکتورونو بیر بیلگی سایار سیستمی ایله بنزلیگینده گؤزلملرسک، بیر سنفونی اورکسترینده اولدوغو کیمی، بیلگی سایار سیستمینده ایکی بویوتون اولدوغونو آنلایابیلریک؛ گوبوت ماددی بویوت، و گوبوت ماددی بوتون ایشله ییشیندن عمله گلن اینجه ماددی بویوت. اینگلیسجه اینفورماتیک ترمینولوژیسینده، بو ایکی بویوت هاردوئر و سوفت وئر اولاراق تانیملانمیشدیر.

انسان استروکتوروندا دا بو ایکی بویوتو جسم و روح اولاراق گؤرمک اولار. انسان استروکتوروندا جسم و روح آراسیندا، سنفونی ارکسترینده و بیلگی سایار سیستمینده اولمایان، قارشیلیقلی بیر ائتگیلشیم وار. روح جسمین ایشله ییشیندن عمله گلن سوفت وئر اولدوغونون یاینیندا، اؤزو جسمی ائتگیلین بیر سوفت وئر دیر. روحون بیلگی سایار سیستمینده اولان سوفت وئر ایله ایکینجی فرقی ایسه روح ائشیک دنیا ایله جسمین ایلیشکیلرینی ده دوزنله ین و کنترل ائدن بیر سفت وئر دیر. جسم دونیانی روح آراجیلیغی ایله آنلاییر. داها دوغروسو روح ائشیک دونیایی آنلاییر و بو آنلادیغینین سونوجونا گؤره جسمی ائتگیله ییر، جسمین هاردا و نه جور بیر عکس العمل گؤسترمه سینین دستورلارینی وئریر.

روح ساغالتیجیلیغین اوبژه سی انسان روحو، دئملی انسان سوفت وئری دیر. روح ساغالتیجی انسانین سوفت وئرینده میدانا گلمیش اسگیکلیکلری بوتونله ییب، آخساقلیقلاری و دوزنیسیزلیکلری دوزنه گتیریب و بو سوفت وئرین ایشله ییشینی اکسکسیز و آقساقسیز سوردوره بیلمه سی یولوندا یاردیمجی اولماق وظیفه سنی یوکنمیشدیر.

 

2- روح استروکتورونا قیسسا بیر باخیش

 

انسان روحونون بیلگی سایار سیستمینده کی سوفت وئر ایله بنزلیگی، بو هر ایکی سیستمین ایشله ییشینین "بیلگی ایشله مه" (ساخت و پرداخت اطلاعات) اولدوغودور. بیلگی سایار سیستمینین ترمینولوژسینده "بیلگی" سؤزو الکتریسیته آخیمی شکلینده تانیملانیر. الکتریسته نین بیر نقطه دن ایکینجی نقطه یه آخماسی، دئملی الکتریسیته نین بیر لحظه اؤنجه بیر نقطه ده اولدوغو و بیر لحظه سونرا ایکینجی نقطه یه یئتیشدیگی، بیر "بیلگی" بیریمی اولاراق تانیملانیر. انسان روحو استروکتوروندا ایسه (نویرولوژی دن سؤز گئتمیر، پسیکولوژی ده) "بیلگی" آلقیلانان (ادراک اولونان) هر شئی دیر. هاوانین سویوق، یوخسا ایستیلیگینین آلقیلانماسی، آغزیمیزا قویدوغومز آلچانین دادی، بارماغیمزا باتان بیر ایگنه نین آلقیلانماسی، دوستوموزون اوزونده کی دوستجا آنلاتیم، دوشمانیمیزین گؤزونده کی دوشمانجا باخیش، بیر یارپاغین آغاجدان قوپوب یئره دوشمه سینی آلقیلادیمیز، بیر قوشون اوخوماسنی ائشیتدیگیمز، قونشودا پیشیریلن یئمگین ایی، باشیمیزا دوشن ایلک یاغیش داملاسی. معلمین گلجک هفته امتاحان آلماق ایسته دیگینی اعلان ائتمه سی، خیاواندا گلن بیر ماشینی آلقیلادیغیمز، بیر آلمانین رنگی، محکمه دن آلدیغیمیز بیر مکتوبون هر کلمه سی، ترافیک چیراغینین یاشیل، ساری یوخسا قیرمیزی اولدوغونو آلقیلادیغیمیز، بیر اؤلکه ده ساواش چیخدیغینی ائشیتدیگیمیز، بیر موسیقی پارچاسی،......... آنامیزدان امدیگیمیز سوت و دوقتوروموزدان بیر هفته سونرا اؤلجگیمیزیین خبرینی ائشیتدیگیمیز......بیر، یوخسا بیر چوخ بیلگینین قارشیغی دیر. دوغولدوغوموز گوندن اؤلجگیمیز گونه دک هر لحظه یوزمینلرجه بیلگی آخیمینین آتینداییق.

بئیین (هاردوئر) بو بیلگیلری ایشله مک اوچون، هر لحظه آخان یوزمینلرجه بیلگیدن آنجاق کیچیک بیر ساییدا و ان اؤنملی اولانلارینی سئچیب، بیلینچلی اولاراق ایشله ییر. دئملی آلقیلادیغیمیز بیلگیلردن بؤیوک بیر بؤلومو بیلینجسیز اولاراق ایشلنیر و بیز بو ایشله ییشه واقف دگیلیک. سحر هاوا آیدینلانانداندا، هاوانین آیدینللانماسینی بیلینجلی اولاراق آلقیلاساق دا، گون بویو ایشیق آلتیندا اولدوغوموزو چوخ زامان بیلینجلی اولاراق یاشامیریق. اوزون بیر یولدا یئریدیگیمیز زامان، بو یولون بؤیوک بیر بؤلومونو آددیم آتدیغیمیزی بیلینجلی اولاراق تجربه ائتمه دن گئدیریک. نفس آلدیغیمیزین بئله چوخ زامان بیلینجینده دگیلیک. اوتوباندا ماشین ایله اوزون بیر یولون بؤیوک بیر بؤلومونو، ماشین سوردوگوموزو بیلینجلی اولاراق تجربه ائتمه دن گئدیریک. بیر چوخ انسان سحر اویاندیغیندا تلویزویونو، یوخسا رادیونو آچار، گئجه یاتاندا باغلار. آنجاق گون بویو تلویزوندان گلن سس و تصویرلری بیلینجلی اولارق تجربه ائتمز. بیلینجسیز تجربه ائدیگیمیز اوبژه لر و اولایلار بیلینجلی تجربه ائتدیکلریمیزین نئچه یوز قاتی اولابیلر. بو باخیش آچیسیندان بئینین ایشله ییشینی یئنه بیلگی سایار ایله قارشیلاشدیردیغیمزدا، بیلینجلی یاشانان اولایلار و اوبژه لرین مونیتوردا گؤرونن بیلگیلر قدر، بیلینج آلیندا ایشله نن بیلگیلرین ایسه بیلگی سایارین بئنینده اولان پروگراملار و داتای لار اولچوسونده اولدوغونا بنزده بیلریک.

دئملی روح استروکتورو عمومی اولاراق ایکی بؤلومه آییریلابیلر: بیلینج کیچیک بیر بؤلومدن و بیلینج آلتی چوخ داها بؤیوک بیر بؤلومدن اولوشموشدور.

 

بو یازینین دوامی اولاجاق

 

 

 

      

دوشنبه, 12 مرداد 1394 15:09

درویش اوغلو

 

ائشکلیک گونلریمدن

(1)

    

آلماندا یاشادیغیم کئچن اوتوز ایله یاخین بیر زامان ایچینده همیشه اؤزلوگومو ساخلاماغا، دیلیمه، دینیمه، موسیقی مه، مدنیتیمه، کولتورومه، تؤره مه، فیکیریمه باغلی قالماغا چالیشمیشام. آلمانجانی چوخ کؤکلو- اساسلی اؤیرندیگیمه قارشین، اؤزلوگومدن چیخیب، آلمان کولتورو ایچینده ارییب گئتمکدن اوزاق دورموشام. ایلک گلدیگیمده، داها گنج ایکن بئله، عینی زاماندا و بیرلیکده گلدیگیمیز جوانلاردان بیر پاراسینین چوخ تله سیکجه، آنلامینی بیلمه دیکلری بیر نئچه کلمه آلمانجا گؤوشمه گه باشلادیقلارینین یانیندا، ساچلارینی ساری بویاییب، ییرتیق جین شالوار گئیمک ایله اؤزلرینی آلمانلارین تؤر-توکونتو جوانلاررینا بنزتمک لری چوخ آجیغیما گلردی. بیریسی، اؤز قارنینی دویورانمادیغنا قارشین، کیچیک بیر تولا بئله آلمیشدی. آلمانیادا کئچیردیلن بایراملار، شنلیکلر، ایل باشی گئجه سی، کارناوال گونلری ده اورگیمه یاتمازدی. بئله گونلرده انسانلارین بوش و ایچریکسیز، یالانچی بیر شادلیق کئچیردیکلرینی حس ائدردیم و هئچ بیر زامان بو شادلیغی پایلاشابیلمزدیم. تصادف اثری کارناوال مراسیمینین ان درین و ان تاریخی کؤکو اولدوغو شهرده، دئملی کؤلن ده یاشاییردیم و هر ایل بو مصیبتی چکمه گه مجبور ایدیم. بیرینجی حیات یولداشیم نازلی ایله ده بئیله بیر مسئله اوستونده چوخ آغیر آنلاشمازلیقلاریم چیخمیشدی. آلمانیادا اولدوغونون ایلی بئله دولمامیش کن، دیل کورسوندا تانیشدیغی بیر قیزین قویروغو اولوب، کارناوالا قاتیلماق ایسته ییردی. بو مسئله اوستونده ایشیمیز وکیله، محکمه یه قدر چکمیشدی. بئیله اؤزللیکلریم بیرچوخ یئرده اجتماعیاتا قاتیلابیلمه گیمین قاباغینی آلماقدا و یاشام یولومدا بؤیوک سورونلار و انگللر یاراتماقدا ایدی. یالنیز بیرینجی حیات یولداشیمی یوخ، عینی زاماندا اونون کیچیک، قارا، سئویملی قیزینی و اوندان سونرا ایکینجی، اوچونجو و دؤردونجو حیات یولداشلاریمی دا بئیله خصوصیتلریمه خاطر الدن وئرمیشدیم. ایش حیاتیمدا دا عینی چتینلیکلریم وار ایدی. تاکسی تصدیغیمی آلینجا ، چوخ آخداردیقدان سونرا تاپابیلدیگیم ایلک امکاندا ایش صاحیبیم ایله تاکسی نین اوسدونده "پاشا"* تبلیغی اولدوغو اوچون بؤیوک آنلاشمازلیغیم چیخمیشدی. سونوندا دا "جهنم اول، گئت هاردا ایشله ییرسن ایشله، منه شوفر لازیمدیر، پیغمبر یوخ" دئمیشدی ایش صاحیبی.

 

ایکی مین اون ایکی ایلینین باشیندان یالنیز ایدیم. یاشیم دا آرتیق ائللی آلتینی دولدوردوغو اوچون یالنیزلیغی اؤنجه کیلر کیمی تحمل ائده بییلمیردیم. یای آیلاریندا، هاوا نین گؤزل اولدوغو گونلرده، اوزمه گه گئتمک ایله، باخچادا گؤی گؤیرتی اکیب، بیجار ائتمک ایله مشغول اولوردوم. آنجاق پاییزین گلیشی ایله چوخ داریخماغا و یالنیزلیغی دایانیلماز حس ائتمه گه باشلایینجا فیکیرلیریمده ده دگیشیکلیکلر اورتایا چیخدیغینی حس ائدیردیم.

"گئده ! بیر آز دا فیکیرلش! اؤزوه گل! بو کهنه بئیینلیگی بیراخ! سن یاشداکی لارین ایگیرمی – ایگیرمی بئش یاشیندا اوشاقلاری وار، بو محیطده بؤیویوبلر، بو دیلده مکتبه گئدیبلر، بو کولتورو آلیبلار،" وایح ناختین"** دا ائولرینه نوئل آغاجی تیکیرلر، آتا آنا لاری دا اونلارا گؤره بیر چوخ شئئی قبول ائله ییرلر، ایل باشی گئجه سی اونلار ایله بیرلیکده تاراققا پاتلاتیرلار. باخ..... بیر پاراسی اوشاغینین هومو سکسئول اولدوغونو بئله قبول ایله ییر، اونون ایله بیر سفره ده اوتوروب یئمک یئییر، "اوغلوم"، "قیزیم" دئیه باغرینا باسیر، اوشاغینین هوموسکسئول یولداشینی بئله ائوه گئتیرمه گینیه گؤز یومور. سن نه قدر داشلاشمیس، متحجر بیر انسانسان، آهان باخ، جماعات راحات راحات ایشله ییر چؤرگینی قازانیر، تاکسینین اوسدونده کی تبلیغه ده باخمیر. سن ده،

" یوخ، مگر من قورومساغام اوسدونده "پاشا" تبلیغی اولان ماشین سورم"

دئیه پیغمبرلیک ائله، بیر جوت باشماق آلماغا پولون اولماسین، بونلار نه سؤزدور،

"یوخ من اصلیمه باغلی قالماق ایسده ییرم" ، بیلمیرم " یوخ، جوهری اولان دگیشیلمز....." ساباح تک اؤله جکسن، جنازه ن آیلارجا اوتاقدا قالیب قوخاجاق.....

"واللهی بوندان سونرا تانیشاجاغیم خانیم نه دئسه، ائله ائله یه جگم، "یوغورد قارادیر" دئسه " بلی خانیم قاپ قارادیر" دییه جگم

پائیزین گونلری قیسسالدیغجا، هاوا سویودوقجا، ائشیکده کی مشغولیت امکانلاری آزالدیقجا من ده یالنیزلیغیمدا درینلشیر و اؤزومو دانلاماقدا داها دا قدارلاشیردیم. نوامبر آینین اورتالارینا یاخین آرتیق بوتون ایشیم گوجوم سحردن آخشاما اوتاغین ایچینده یئرییه یئرییه اؤزومه دانلاق وورماق اولموشدو. الله گؤرستمه سین، او "دپرسیون" دئییلین شئی بلکه ائله بو ایمیش. بیلمیرم، آنجاق دانلاقلاریم گئت گئده درینلشیر و فردی چرچوه دن چیخیب اجتماعی و فلسفی بوی لارا چاتیردی:

"اوغول باخ، ماتریالیزم دیالکتیکده بیر اصل وار، "تاثیر و تاثیر متقابل". دئملی انسان اورتامیندان تاثیر آلمالی و آنجاق او زامان دیر کی اورتامینا تاثیر قویابیلر......."

بئله "کلمات قصار" لار منیم اوچون تازا دگیل ایدی. اؤز اوستومده هئچ ده تاثیری اولمایان بئله سؤزلری بیر چوخ یئرده اونا - بونا ساتمیش و اؤزومون نه قدر بیلگین و درین انسان اولدوغومو اثباتلاماغا چالیشدیغیم گونلریم آز دگیل ایدی. آنجاق سونوندا بیچدیگیم حاصیل یالنیزلیق، ایشسیزلیک، اومیدسیزلیک و اؤزومو دانلاماق اولموشدو. یالنیزلیغیمدا ایلک یول ایللرجه آیریلارینا تحویل وئردیگیم "کلمات قصار" این اؤز اوستومده نه قدر ائتکی سیز، تاثیرسیز و آنلامسیز اولدوغونو آچیقجا حس ائدیردیم.

آینانین قاباغیندا دایانیب دوردوم. ساغ المین بیرینجی بارماغینی تهدید اشارتی اولاراق آشاغی – یوخاری تئرپه درک:

"اوغول، باخ، بوردا منم، سن، آیری بیر آدام یوخدور، سنه دئییرم، اؤزوو دگیشدیرمگی، انعطافلی اولماغی، تازا شرایطی قبول ائتمگی و وار اولان امکانلاردان یارارلانماغی اؤیرندین ایسه، یاشایا بیله جکسن، یوخسا بو ایللر سون ایللرین اولاجاق، بیر داهاکی نوامبر آیینی بئله گؤره بیله جگیندن شبهه ائدیرم....."

دئیه تهدید ائتدیم.

"بو اینترنت، بو چتلشمک، بو اس.ام.اس یازماقلار تازا نسلین بئینینی خاراب ائیله ییر، بو جوانلار گونده دؤرت ساعات اینترنت ده چت لشه جکلری یئرده بیر نئچه صفحه اؤیردیجی کیتاب اوخوسالار داها یاخچی اولار......."

کیمی فیکیرلریمی سیلیب، بیر قیراغا آتیب و اینترنتین باشینا اوتوروب،" سینقلز"*** بؤلوملرینده آخدارماغا باشلادیم. دسامبر آیینین اورتالارینا دک جوانلی، قوجالی بیر نئچه خانیم ایله دانیشدیم و بیریسی ایله ده قهوه ایچمه گه گئتدیم، آنجاق دالیسی گلمه دی. اومودسوزلشمه گه باشلادیغیم یئرده، قدیم یولداشلاریمدان چوخ گووندیگیم و بیلگین لیگینه ایناندیغیم قنبر، یاخچی بیر اوگود وئردی.

"بئیله کندلی مندلی گؤرونوش ایله اولماز، بیر آز دا ظاهرینی دگیشدیرمه لی سن"

دئدی.

اوندان سونرا ساققلایمین آشاغیسینی قیرخمادیم، بیر نئچه گون سونرا گؤزه گورنن قدر اولموش کئچی ساققالیم ایله آینا دا اؤزومو بیر آز "اینتلکتوئل" گؤرودوم. کئچی ساققالیم نه قدر چوخ اوزانسا ایدی بیر اوقدر داها "اینتلکتوئل" گؤرونه جک ایدیم. بیر نئچه گون سونرا بیت بازایندان قدیم روس اوردوسوندا گئییلن جیللیققالارا بنزر کؤهنه بیر جیللیقا آلدیم. بئیله جه اؤزومو آینا دا بیر آز داها "اینتلکتوئل" گؤروب، اینترنت ده راست گله جگیم بیر سونراکی خانمیا اؤزومو بیر یازار و فیلسوف اولاراق تانیتابیلمک امکانی ذهنیمه گلدی. شانسین خوشلوغوندان، چوخ چکمدی، بیر نئچه گون سونرا چت لشدیگیم و سونراسی فیس بوک دا گؤروشدوگوم آلمانلی خانیم اللی بیر یاشیندا اولدوغونو ادعا ائدینجه آیاغیم یئره یاپیشدی. من اونو بلکه ده اوتوز یئددی – اوتوز سکگیز یاشیندا تخمین ائده بیلردیم. گنجلیگی، گؤزللیگی، ادبی، تربیه سی، سایغی سی، احترامی، هر شئیی یئرینده بیر خانیم ایدی. من اونون ادبینه، معرفتینه وورلدوغوم کیمی او دا منیم "اینتلکتوئل" لیگیمه وورولموش دئیه فیکیرلشیردیم. نه ایش گؤردوگومو، نه قدر پول قازاندیغیمی، ائویم، ماشینیم، اضافه حقوقوم اولوب اولمادیغینی سوروشموردو، آنجاق اجتماعی مسئله لردن، انسانلیقدان، قادین حقلریندن، محیط زیست دن فیلاندان دانیشیردیق. دانیشماغیمیزین سونونا یاخین دا بیر سونراکی جمعه ائرته سی، آخشام ساعات آلتی یاریمدا رودولف پلاتس دا آخنر اشتراسه نین چیگینینده کی بؤیوک میخانا دا قارارلاشدیق و ائیله جه ساغ اوللاشدیق.

گل کئیفیم گل، دپرسیونوم کئچدی، اورگیم گئنه یاشام هوسی ایله دولدو.راحاتجا نفس آلماغا باشلادیم. بیر ساعات اؤنجه یه قدر قارانلیق گؤردوگوم گله جگیم اومید ایشیقلاری ایله آیدینلاندی. آینادا گؤزومون اییچیندن ایشیق ساچدیغینی، اوزومون قیریشلارینین آچیلدیغینی و رنگیمین آیدین و اومود دولو بیر پارلاقلیق ایله جلالاندیغینی آپ- آیدین گؤروردوم. سول الیمین بارماقلارینین اوجو ایله کئچی ساققالیمی سیغارلارکن دیل دوداغیم آراسیندا:

"امشب دلم میخواد تا فردا می بنوشم من

زیبا ترین جامه هایم را بپوشم من

دیم دام دارام دام...دام دارام دام دیم، داریم دام دام

ریم دام دریم ریم، ریم دارام رام رام، دارام رام رام

بعد از جدائی ها، آن بیوفائی ها

فردا تو می آئی

فردا تو می آئی

ریم دام دریم ریم ریم، رام ریم دارام ریم رام

ریم رام دارام ریم رام

رام ریم دارام ریم رام

....................................................

......................................................"

دئیه تیکرار تیکرار اوخوماقدان،آیاق پنجه لریم اوستونده آتیلا آتیلا یئریمکدن، گئنه گلیب آینانین قاباغیندا دوروب کئچی ساققالیمی سیغارلاییب، "اینتلکتئول" لیگیمین دادینی چیخارتماقدان دویا بیلمیردیم. گئنه پنجه لریم اوسته آتیلا آتیلا شراب دیلابیمین قاپیسینی آچدیم. بئش لیتیرلیک بؤگوتگن (تمشک) شرابلاریمدان بیریسینی گؤتوروب، دیبینده کی چؤکونتونون قالخیب شرابی بولاندیرماماسی اوچون شیشه نین الیمده تیتره مه مه گینه دیققت ائدرک یاواشجا میطباغا آپاردیم. کیچیک بیر شوشه نی دولدوروب، قوش قونماز کؤکو پیشیرمک اوچون دوزلتیلمیش اوجا بویلو قابلامانین ایچینده کی ایستی سویا قویوب، ایچینه ده بیر آز بال تؤکدوم. آلمان کولتورنده قیشا یاخین، هاوالار سویودوغوندا ایستی و شیرین شراب ایچیلر. شرابیمی ایچندن سونرا دا تلویزیونون قارشیسیندا نه زامان یوخلادیغیمدان خبریم اولمامیشدی.

ایکی گون سونراسی قارار ساعاتینین ثانیه سینده، الیمده بیربوتاق قیرمیزی گول ایله قارارلاشدیغیمیز میخانا نین قاپیسیندان ایچری گیریب، ساغیما – سولوما باخدیم. بیر اؤنجه کی آخشام فیس بوکدا گؤروشدوگوم خانیما بنزر بیریسی یوخ ایدی اوردا. گئنه ساغا- سولا باخاراق بارین قاباغینا یاخینلاشدیم و بارداکی گئنچ قیزدان بئیله بیر خانیمین اورایا گلیب – گملمه دیگینی سوروشماق ایسده ییردیم، آنجاق جوابیمی دا اؤزومده تاپدیم،

"سنین کیمی سوروشدوغونو هاردان بیلسین بو قیز؟"

نه ایسه بو فیکیرلر ایله میخانا نین اورتاسیندا آوارا ایکن بیر ده قاپیدان بیر آز اوجا بویلو، چوخ گؤزل بیر خانیمین، دیزیندن بیر آز آشاغییاجان اولان چوخ قیمتلی خز پالتوو، باشیندا گئنه چوخ قیمتلی گؤرونن، دوره سینده قیرمیزی ایپک دستمال ایله گول دوگونلنمیش قهوه رنگلی شاپوسو، بوینوندا شاپوسونون رنگینه اویغون ایپک شالی ایله، ایچری گیریب، منه ساری گلدیگینی گؤردوم. اولدوغوم یئرده قورویوب قالدیم،

"یوخ، بو اولابیلمزدی، من بئله بیر خانیم گؤزله میردیم. بو یالنیز فیسی، افاده سی ایله منیم وار – یوخومو آلیب ساتاردی"

آنجاق تمکینلی آددیملار ایله منه ساری گلدیگینی گؤرونجه، آدینی خاطرلاماغا چالیشدیم، اونوتاجاغیمی بیلدیگیم اوچون سول الیمین بیرینجی بارماغینین ایچری یانینا یازدیغیم حرفه باخدیم؛ آ،

"آ دئمک آنیتا می ایدی یوخسا آنگلیکا می؟"

بو چاشقینلیق ایچرسینده ایکن خانیم منه یئتیشیب، چوخ دوغرو بیر تلفظده آدیم ایله چاغیراراق گؤروشمک اوچون الینی اوزالدیب،

" من آنیتا"

دئیه اوزونو تانیتدیردی.

چاشقینلیغیمی گیزلتمک مومکون دگیل ایدی. منیم آدیم عربجه دن گلیر و عربجه یازی شکلینی بیلمه یه ن لردن هئچ کیمسه اوگونه قدر منیم آدیمی دوغور تلفظ ائده بیلمه میشدی. او ایسه منیم چاشقینلیغیمی حس ائتمیش کیمی، دونوقلوغومو آچماق اوچون الی ایله میخانا نین گوشه سینده خلوت بیر میزه اشاره ائدرک

"بویورون اوردا خلوت بیر گوشه ده اوتوراق"

دئدی.

بیر – ایکی قوردوم آرپاسویو ایچدیکدن سونرا، باشداکی چاشقینلیغیم چکیلدی، دونوم آچیلدی و بو خانیم ایله آرامدا ایللردن بری تانیشیرمیشیق کیمی بیر یاخینلیق و راحاتلیق یاراندی. سؤز آپاریجیسی نین من یوخ، او اولدوغونو حس ائدیردیم. من ایسه بئله سینه داها راحات ایدیم. سؤز آپاریجیلیغی منه دوشسه ایدی، گئنه دونوب قالاجاق ایدیم. بیر- ایکی قورو ودویغوسوز سورودان سونرا اوسدومه سوسقونلوق و آغیرلیق چؤکه جک ایدی. اسنه مه گه باشلایاجاق ایدیم. او ایسه دانیشیغیندا انرژی ساچیردی سانکی، حرارتلی و ایستکلیجه دانیشیر و مندن چوخ شئیلر سوروشوردو.

"سنیین کیمی بیریسینی چوخدان دیر آخداریردیم"، "چوخ اورگیمه یاتدین"

دئییردی. من ایسه اونا حیران اولموشدوم. قاپی دان گیردیگینده گؤردوگوم و قورخدوغوم باهالی پالتارلار ایچینده کی آرواد دگیل ایدی سانکی، خز پالتوونو چیخاردیب یانداکی صندلیین اوستونه آ تمیشدی، شاپوسونو دا گئنه چیخاردیب میزین اوسدونه قویموشدو. گئیدیگی کشمیر یونوندن اولان پولیور بدنینده گئنه - بول یوخ، بیر آز دار کیمی دوردوغو اوچون دؤشلرینین نوماسی ایله بئلینین اینجه لیگینی آیدینلیقلا گؤرمک مومکون ایدی. او پولیورین آلتیندا مرمر کیمی بیر بدن اولسا ایدی گرک. شاپوسونو چیخاردینجا خورما رنگی اوزون ساچلارینین چیگینلرینه تؤکولوشو، بیر آز اوزونسو و خوشتراش چهره سینین یان طرفینی اؤرتدوگوندن دوغرودان دا اینانیلماز بیر گؤزللیک وئرمیشدی اونا. دانیشارکن کلمه لر آغزیندان یوخ، بال رنگلی گؤزلرینین ایچیندن چیخیردی سانکی، هر کلمه سی انسانین ایلیگینه دک ایشله ییردی. ایچی بوش بیرانسانا بنزمیردی.

اوندان کیم و نه چی اولدوغونو سوروشماغیما جسارت ائتمه یه جگیمی آنلامیش کیمی، اؤزو آنلاتماغا باشلادی:

"من کؤلن اونیورسیته سینده سوسیال پسیکولوژی بؤلومنده آزاد معلمه یه م"

ائشیتدیگیمه اینانمادیم. کؤلن اونیورسیته سینین معلمه سی نه اوچون گلیب منیم ایله فیس بوک دا چئت ائله ییب ده، اوندان سونرا منیم ایله یولداشلیق قورماغا چالیشسین؟ نه ایسه، "منیم ده بیر نئچه مسلگیم وار، آنجاق ایندیلیک کامیون شوفرلیگی ائله ییرم، یان بیر مشغله اولاراق دا یازماق ایله، بیر آز دا موسیقی ایله مشغول اولارام"

دئدیم.

دققت ایله گؤزومون ایچینه باخاراق:

"سیزین موسیقی نیزده خاص بیر "دردکشلیک" وار ، بونون کؤکونو تانییرسان می؟" دئیه سوروشدو.

"دوغرودور، موسیقی میزده آغیر بیر کدر وار، آنجاق بونون هاردان گلدیگینی من بیلمیرم"

دئدیم.

"عینی فنومن (پدیده) گونلوک دانیشیغینزدا، ادبیاتینزدا، شعرلرینیزده ده گؤرونور"

دئدی.

"دوغروسونو ایسدرسن، بونا دققت ائله مه میشم"

دئدیم.

"کلاسیک شعرلرینیزین چوخو یا یالواریش دیر یا دا درددن، آغری دان، خسته لیکدن شکایت دیر"

سول الیمین بارماقلارینین اوجو ایله بیغیمی، کئچی ساققلالیمی بیرنئچه یول یوخاریدان آشاغی تومارلاییب، گئنه سول الیم ایله باشیمین دالیسینی، بوینومون کؤکونو اوخشادیقدان سونرا دئیه جک بیر شئی تاپابیلمه دیگیم اوچون:

"بلی اولابیلر، من شعر ایله چوخ مشغول دئیلم"

دئدیم.

"دور او زامان من بیرآز سنه آنلادیم، من بو شیئلر ایله مشغولام و سن ده منه گلجکده یاردیمچی اولابیلرسن"

دئیه سوزونه ادامه وئردی.

"باخ، بیزده، فرانسه ده، اسپانیادا، بوتون آوروپادا بیریسی بییریسنه راست گلدیگیینده، اونون کیفینی سوروشدوغوندا، سوروشولان "یاخچییام"، "چوخ یاخچی دگیلم"، "ساغ اول"، "اوزون نجورسن" کیمی بیر شئی دئیر، سیزین کولتوروزده بیریسنین کئفینی سوروشاندا هئچ ده ارتباطی اولمایان شئیلر آنلاتماغا باشلار، "نوکرم"، "کیچیگم"، "تورپاغام" "مخلصم"، "قوربان اولوم".... دئملی بیر یاندان مدیونلوق، بورچلولوق، بیر یاندان دا اؤزونه حقارت، کیچیکلیک، آلچاقلیق گئتیرن صفت لر ایشله در اؤز باره سینده. آوروپادا کارناوال گونلری یا دا آیری شنلیکلرده جماعات گروه گروه کوچه لرده گئده گئده چالیب اوخویارو شنلیک ائدر، سونرا دا گئدیب میخانالاردا آلکول ایچییب، دئییب گولوب دانیشلارلار. سیزلرده ایسه ایلین بللی آیلاریندا جماعات گوروه گوروه کوچلرده گئزه رلر، اؤزلرینی دؤگرلر، اؤزلرینی یارالارلار، سونرا دا گئدیب بؤیوک بیر دام دا اوتوروب هامی لیقجا باشلارینا ووروب آغلارلار. بئیله اجتماعی مراسم لرین تاثیری او کولتورون هر گوشه سینده گؤرونور، شعرده، ادبیات دا، موسیقی ده، نقاشی ده، سیناما دا، تئاتردا، و البته کی انسانلارین خصوصی و فردی رفتار و عادت لرینده....."

آنیتا بونلاری آنلاتیرکین بیر لحظه ده بوقدر ایلدیر کارناوالدان زهله م گئتدیگینین، کارناوالدا جماعاتین شادلیغینی و شنلیگینی بوش و آنلامسیزحس ائتدیگیمین و بو شادلیغی پایلاشابیلمه دیگیمین ندنینی تاپدیم کیمی اولدوم. جماعاتی کوچه ده دسته دسته یئریرکن گؤردوگومده اونلارین اؤزلرینی دؤگه دؤگه و آغلایا آغلایا یئریمک لرینی گؤزله ییرمیشم. دئملی گؤزوم بئیله عادت ائتدیگی اوچون جماعاتین گوروه گوروه یئیریب شادلیق ائتمک لری، شیرینی و گول پایلاماقلاری منیم اوچون آنلامسیز گلیرمیش.

گؤزلریمین دالغینلیغیندان ذهنیمین آیری یئرلره اوچدوغونو حس ائتمیش کیمی،

"باغیشلایاسان، ایلک گؤروشومده سنه بو قدر آیدین دانیشیرام، بونلاری اؤزونه توهین فیلان کیمی آلما، من بو موضوعلار ایله مشغول اولدوغوم اوچون، هاوادان سودان، سریال فیلم لردن فیلاندان صحبت ائتمگی باجارمیرام. ..."

سؤزونو یاریدا کسدیم،

"یوخ جانیم، سن راحات اول، من ده بئله موضوع لار اوسدونده دانیشماغی یئی بیلرم."

یالاندان قولاق آسیردیم، ذهنیم آیری یئرلرده ایدی: آلمانا تازا گلدیگیم ایل لرده کؤلن شهرینده، هوهن تسولررینگ ده(شهرین گئزمه لی خیاوانلاریندان) هر سکس شاپ ین قاباغیندان کئچدیگیمده اؤزوم اؤزومه دئگینیردیم؛

"بیلمیرم، کارل مارکس ین، فریدریش انگلس ین یاشادیغی جامعه ده بو توکانلار نه دیر؟ بونلارین یئرینه ایندی کیتابچی توکانلاری اولایدی گرک!" بیز بو انسانلارین آرمانلاری اوچون، ایدئولوژی لری اوچون نه لره دایانمالی ییق، بو اینسانلارین بیر سطیر یازیسینی اوخوماق اوچون مین بیر سیچان دلگینه گیریب چیخمالییق، بونلارین جوانلاری دا سکس شاپ لاردا گئزیرلر......"

نئچه آیلار، نئچه ایللر بو فیکیرلر ایله ایچیمی یئدیگیمی، آلمان توپلوموندا یاشایان جوانلارا "تعیین تکلیف" ائله دیگیمی ودانیشیلان دیلینی بئیله داها اؤیره نه بیلمه دیگیم بیر توپلوما بئنیمده کی پلانلاریمی یوکله مه گه چالیشدیغیم گونلریمی، اؤزومون هامی دان چوخ بیلدیگیمی تصور ائتدیگیم اوچون، توتدوغوم یاشام استراتژی سینین ده ان دوغرو و هر کس اوچون کئچرلی اولدوغونو دوشوندوگوم و هر کسه یوکله مه گه چالیشدیغیم گونلریمی و سونوندا دا هئچ بیر سونوجا یئتیشمه دیگیمی خاطرلایینجا ایچیمدن گولمه ک ایله آغلاماغین قاریشیغینا بنزر بیر "پیق پیق" چیخیدی. آنیتا تعجب ایله گوزومون ایچینه باخاراق،

"نه اولدو؟ من گولمه لی بیر شئی دئمدیم"

دئدی وگئری چکیلیب صندلیسینیه سؤکنرک آرپا سویو لیوانینی گؤتوروب ساغلیق فیلان وئرمه دن قورتوملاماغا باشلادی. اوتانجیمدان باشیمی آشاغی سالدیم. سول دیرسگیمی میزه سؤکه ییب چه نه می سول الیمین یوموروقلادیغیم بارماقلارینین اوستونه دایاییب گئنه فیکره گئتدیم. بیر آرواد ایله تازا تانیشیب، اونون ایله یولداشلیق باشلاماق ایسته ین بیریسی کیمی یوخ، اعتراض محکمه سینه حاظیرلانماق اوچون اومودسوزجا وکیلی ایله خصوصی بیر گؤروشمه ده اولان اؤلومه محکوم کیمی ایدیم. بوگون اؤزومدن سیلیب آتماغا چالیشدیغیم بو فیکیرلریمی ایللر بویو آیری جوانلارا، اؤزگه لره یوکله مه گه، بوگونکو تعبیریم ایله اونلاری زهیرله مه گه چالیشمیشدیم و بونو اؤزومه افتخار بیلمیشدیم. آرپاسولاریمیزین سون قورتومونو ایچدیکدن سونرا آنیتا،

"من گئتمه لییم، سونرا گؤروشریک"

دئدی و آیاغا قالخدی.

آنیتادان آییریلیب، رودولف پلاتس تراموای دوراغینین دمیر پیلله لری اوسته آشاغی ائنمه گه باشلادیم. سانکی ایکی ساعات اؤنجه کی من دگیل ایدیم. هر شئیی آیری جور گؤروردوم. اطرافیمداکی انسانلارا اؤنجه کی لر کیمی یوخاریدان باخیب، اونلارا نه جور بیر یاشام استراتژی سی قاباغا آپارماقلارینی ذهنیمده دیکته ائتمیردیم آرتیق، دووارداکی تبلیغ لری بئله اؤنجه کی لر کیمی "کاپیتالیست سیستمین میندار و نامشروع استثمار وسیله سی" اولاراق یوخ، منیم اوچون آرتیق هئچ بیر آنلامی اولمایان شکیللر کیمی گؤروردوم. تراموای دوراغیندا قوجاقلاشیب، اؤپوشن جوان قیز و اوغلانلارا دا گئنه ذهنیمده "خیاواندا اؤپوشه جکلری یئرده، جیددی بیر مسئله اوسدونده ایکی کلمه دانیشسالار ایدی، بو جامعه ده چوخدان انقلاب اولاردی" کیمی یاشام یولو تعیین ائله میردیم. تراموایا میندیگیمده، حیاتیمدا ایلک یول بلیطسیز توتولارام قورخوسوندان یوخ، بلیط آلماغین تراموای دان یارارلاناماق اوچون گرکلی بیر شرط اولدوغونوآنلایاراق و حس ائدرک، بلیط اوتوماتینا پول آتیب و گئده جگیم یول اوچون بلیط آلدیم. "بو توپلوم امپریالیستی بیر توپلومومدور،بو توپلومدا هر قایدا – قانونو پؤزماق، منیم اوچون مشروع دور" فیکرینین هاردان گلدیگینی بیلمیردیم، آنجاق کئچن ایگیرمی نئچه ایل ده بو منیم یاشام فلسفه م اولدوغونو و عینی زاماندا دا دوغرو بیر فیکیر اولمادغینی ایلک یول حس ائدیردیم. بو یاشام فلسفه سینی اؤیرندیگیم ایلک گونلریمی خاطرلاماقدان بئیله چکینیر و اوتانیردیم. بئیله بیر یاشام فلسفه سینی کیمسه منه ایسده یه رک، و اؤیرتمک نییتینه درس وئرمه میشدی. آنجاق ایلک گلدیگیمده مندن بیر نئچه آی اؤنجه گلن یولداشلاریم و تانیدیقلاریمین بئیله بیر دونیا باخیشی تاپدیقلارینی گؤرونجه، بو توپلومدا بیزلر اوچون دوغرو اولانین بو اولدوغونو اؤیگرنمیشدیم. بیلمیرم بلکه انسانلیق تاریخینده یوزمین ایللرجه کؤچه ریلیک و دؤگوشچولوک ایله یاشایان نسللردن ژنلریمیزده قالیب بئیله بیرشئی. دئملی" تازا یئتیشدیگین یئرده سوی، چاپ، تالان ائت، یول، ییخ، بیراخ گئت" کیمی بیر یاشام فلسفه سی؟ بو فیکیرلرده ایکن بیر نئچه دوراق سونرا ائنیب مینن لرین آراسیندا جوان بیر قیز ایله جوان بیر اوغلانین دانیشا دانیشا میندیکلرینی گؤرونجه اختیاریمدا اولماقسیزین اورگیم چیرپینماغا باشلادی. قاپیلار باغلانینجا ایکیسی ده کیملیکلرینی گؤسته ررک اؤزلرینین بلیط کونترولچوسو اولدوقلارینی بیلدیریب، کونتورول ائتمه گه باشلادیلار. آرامیزدا اولان اون آددیملیق بیر اوزقلیقدا، اون – اون بئش نفری کنتورول ائدیب منه چاتینجایا قدر اورگیم آز داها سینه می ییرتیب چیخاجاق ایدی. نفسیم دارالمیشدی. آغزیم قوروموش و دیشیم ایسده گیمده اولمادان قیسیلماقدا ایدی. جیبیمده بلیطیم اولدوغونو یاخچی بیلیردیم، آنجاق بو قورخونون هاردان گلدیگینی بیله بیلمیردیم. بیر سونراکی دوراقدا تراموای دوران کیمی قاپی یا ساری هجوم گئتیردیگیمده، جوان اوغلان قاباغیمی توتدو.

"لطفا بیلیطینیزی گؤسترین اوندان سونرا ائنین"

اونسوز دا شالواریمین جبینده بلیطی الیمده حاظیر توتموشدوم. آنجاق بو نئچه دقیقه ایچینده الیمین بلیطی یاش ائده جک قدر ترله دیگینیه دیققت ائده بیلمه میشدیم. الیمی جیبیمدن چیخاردیب ایچینده کی یاش و بوزوشموش بیلطی جوان اوغلانا گؤستریم. آلیب دیققت ایله باخدی و تمکین ایله،

"بیرآز چتین اوخونور، آنجاق اوخونور"

دئیه رک گئری وئریب و قاپینی گؤرسه ده رک

"بویورون"

دئدی.

تراموایین قاپیسیندان آشاغی آتلایان کیمی قاچماغا باشلادیم. آنجاق نیه سینی و هاراسینی بیلمیردیم.

او گئجه، نه زامان و نه جور ائوه گلدیگیمی یاخچی خاطرلایابیلمیرم. ائرته سی گون، گون اورتایا یاخین اویاندیغیمدا باشیمدا بیر آغری، بوتون بدنیمده بیر آغیرلیق و یورقونلوق، بئینیمده بیر گیجلیک و سمه لیک حس ائدیردیم. بئنیمین ایچینده آری پتگی نین ایچی کیمی بیربیرینه اویمایان نئچه یوز فیکیرآخیردی. من بیرنفر یوخ اوتوز- قیرخ نفر کیمی ایدیم. اوتوز قیرخ نفرین ذهنیندن کئچنلر قاریشیق و چاخناشماز بیر شکیلده بئنیمده ویزیلدا ییردی. گؤزومو آچیب یان – یؤوره مه باخینجا ائوده اولدوغومو آنلادیم. آنجاق عجاییب بیر وضعیت ایدی. قالخیب یاتاغین اوسدونده اوتوردوم. شالواریم ایله یاتمیش ایدیم. شالواریم ایسه پالچقلی ایدی. دیزلرینده داها چوخ پالچیق گؤرسه نیردی. باشیمدان کئچنلری خاطرلایابیلمک اوچون ذهنیمی بیر یئره ییغماغا چالیشدیم، آنجاق مومکون دگیل کیمی ایدی. خاطرلایا بیلدیکلریم گؤزومون اؤنوندن سرعت ایله کئچن قاریشیق آنی لار ایدی. آلتی یاشیمدا ایکن چؤرک یاپان فیضه خالانین منه کوکه یاپمادیغی اوچون آغلادیغیم ایله بیر اؤنجه کی هفته یولداشیم قنبرین

"بو کندلی – مندلی قیافه ایله اولماز"

دئدیگی سانکی بیر گون و بیر ساعات ایچینده اولوب کئچن اولایلار ایدیلر. بیردن بیره اوبیری اوتاقدان آیاق سسی ائشیدینجه آیاغا قالخماغا چالیشدیم، آنجاق باشیم گیجه للنن کیمی دیزلریم گئری بوکولدو و دالی دالی یاتاغین اوستونه دوشدوم. چاشقینلیق ایچینده یولداشیم قنبرین منه آیاغا قالخماغیما یاردیم ائتدگینی گؤرونجه هله یوخودا می، یوخسا آییق الدوغومو آنلایابیلمک اوچون

"گئده قنبر، دوغرودان دا سن سن؟"

دئیه سوروشدوم.

قنبر ایسه گوله رک

"اده، بس من یوخ، کیم اولاجاغینی گؤزله ییرسن؟"

دئیه الیمی توتوب آیاغا قالخماغیما یاردیم ائتدی. پالتاریمی دگیشیب، بیر دوش توتونجا قنبر گؤزل بیر قاینالتی حاضیرلامیشدی. بیر- ایکی ایستیکان چای، بیر – ایکی تیکه چورک دن سونرا قنبر آنلاتماغا باشلادی.

"گئده دونن آخشام گؤردوم کلودویق پلاتس دا (شهرده بیر میدان) اؤز اؤزووه دئیینه دیئنه گئدیرسن، قاباغینی توتودم، سلاملاشدیم، منی تانیمادین، "چکیل قیراغا قارداش، گئدیرم تئرسه چوئیرم" دئدین." نه یی تئرسه چئویرسن؟" دئیه سوروشدوم. "بوتون دونیانی" دئدین و جیبیندن عراق شیشه سینی چیخاردیب آغزینا دایاییب تئرسه چئوره رک "آها بئله باخ، بوتون دونیایی ترسه چئویرمک ایسده ییرم، چونکو ایندیه جن ترسه باشادوشموشم" دئدین. باخدیم کی قاباغینی توتابیلمه یه جگم. چکیلدیم قیراغا، اون آددیم دالینجا گلیردیم. گیردیگین هر کیوسکدان بیر شوشه عراق آلیب چیخیردین. فریزین پلاتسا (شهرده بیر میدان) جان دالینجا گلدیم. فریزین پلاتس دا "داس دینگ" دیسکوسونون اؤنونده دورب سیگار چکمک اوچون ائشیگه چیخمیش جوان اوغلانالار لا قیزلارا باخیردین و "هر شئی ترسه ایمیش، ترسه چئویرمک لازیمدیر" دئیه دئیینیردین. بیر آز سونرا چکیلیب بیر قیراغدا یئره اوتوردون. بیر آز سونراسی دا اللرینی یئره قویوب باشین اوسته دورماغا چالیشیردین، آنجاق دورابیلمیردین، ییخیلیردین. من ده سنی تانیمیر کیمی اوزاقدان دوروب باخماقدا ایدیم. اونسوزدا قاباغا گلدیگیمده تانیمایاجاق ایدین. باخدین کی میل دورابیلمیرسن قالخیب خیاوانین قیراغینداکی چینار آغاجینین یانینا گئتدین. چینار آغاجینین یانیندا میل دوردون آیاقلارینی آغاجا سؤکه دین و "آهان، دوزلدی، ایندی دوز گؤرورم" دئیه دئگینمه یه باشلادین. ییخیلیردین، قالخیردین، میل دوروردون، گولوردون، "آهان ایندی دوز گوره جگم، آهان ایندی دوز گؤرورم" دئییردین. جوان اوشاقلار چپیک چالیردیلار، بیر پاراسی خیردا پول آتیردیلار، اوشاق کیمی سئونیردین "سونوندا دوزلتدیم، باخ دوزلتدیم" دئییردین. آخیردا یورولدون، چینار آغاجینین یانیندا یوخلاماغا باشلادین. بیر تاکسی چاغیردیم، تاکسیا میندیریب ائوه گئتیدریم"

دئدی.

 

* کؤلن شهرینین فاحشه خاناسینین آدی "پاشا" دیر.

 

**" وایح ناختین" کریسمیس بایرامیندان بیر هفته اؤنجه توتولان مذهبی بایرام دیر.

 

کلمه سینی متنین اورتاسیندا لاتینجه یازابیلمه دیم. Singels ***

 

بو ناغیل اوچ بؤلوملو بیر ناغیل در. ایکینجی و اوچونجو بؤلوملری سونرا یاییلاجاق.

شنبه, 13 تیر 1394 15:45

درويش اوغلو

معصومه نين محزون باخيشي *

نه باخيرسان بئله محزون؟
يوخسا دونيا ييخيلير؟ سو تاپيلمير ايچيله؟
قورويور دوزلو گؤلون؟ شورا قالخير هاوايا؟
نوح طوفاني قوپور تبريزده؟
نفس آلديقدا اوتور دوز جگيرين؟

نه باخيرسان بئله مکتوم؟
باخيشيندان اوخونور، سانکي کسيبلر ديليني
يازماغا بير قلم آلدينسا قيريبلار اليني
اولمايا حبس و شکنجه گؤرورسن رؤياده؟
عؤمرونون گنج چاغيندايسا بوکوبلر بئليني؟

نه باخيرسان بئله مظلوم؟
باخيشيندا قارا بايرام گؤرونور
کوي و بازاردا انسان آسيلير؟
يوخسا بير لقمه چؤرک آغزينا تپميش جوانين،
حددي تعيين اولونوب ال کسيلير؟

نه باخيرسان بئله محزون؟
باشلاريندا ساريغي، ميللتي ارعابه ساليرلار؟
خياواندان توتولان قيزلاري اعرابا ساتيرلار؟
يوخسا بو خلق ايوشوب، آنلامايير ارعابي،
افيونلا هوشونو، عقليني، جان – مالين آليرلار؟

نه باخيرسان بئله مظلوم؟
کؤرپه نين سود مه مه سين يوخسا آپاردي سرطان؟
دلي - ديوانه کيمي چايخادا سرگردان
قارداشين جنگ ده وئرميش آياغين اسلامه؟
باجين ارسيز يئتيشيب قيرخا، اولور ديوانه؟

نه باخيرسان بئله محزون؟
گؤزلرينله دانيشيرسان، نييه کي يوخدور ديلين
چاتمايير تانرييا دا، گؤيلره آچسانسا الين
نئجه ييغدين بو قدرداغ کيمي دردي گؤزونه؟
بير باخيشلا بوتون افلاکه چاتير دردي ائلين

نه باخيرسان بئله محزون؟
آچيليب مکتب و منبر اوخونور قرآن لار
اينانيرلار، گلجک مرجع عدل، انسانلار
او زاماندير کي عدالت قيلينجي حؤکم سورر
کسيلر حؤکم عدالت له نئچه قوربانلار

نه باخيرسان بئله محزون؟
هله گؤزله، او زامان چوخ چکجک
ياخجي – پيسلرده سيناقدان کئچجک
تا ظهور ائيله يه بو شمس عدالت مظهر
بير چوخ انسان اورگي چوخلو قارا قان ايچجک

نه باخيرسان بئله محزون؟
گلمه ميش شمس عدالت عؤمورون چاتسا باشا
دهر باقي ده گؤررسن نئجه دير بو تاماشا
حوري – قيلمان نئجه حاظير دوراجاق گؤزله يه جک
کي صراطي کئچه سن تا او باشا.

نه باخيرسان بئله محزون؟
نه باخيرسان بئله معصوم؟
نه باخيرسان بئله مضلوم؟
نه باخيرسا بئله مکتوم؟

* معصومه بير آد اولاراق يوخ، عصمتلي خانيم آنلاميدا ايشله نيليب

طراحی و توسعه توسط رافق مجتهدزاده خیاوی